Мин йокламый таң аттыра алам!..

Мин йокламый таң аттыра алам!..
Һәм яктыра алам шәфәкъ булып!
… Шик кортлары җанны телем телә:
Бетәм микән бу дөньяга сыеп?!

Кылын тартып салкын җилләр исә —
Күңел фитиленең уты сүрән…
Маңгаеңда җыерчык юк димә —
Йөрәк тулы сырлар!.. Алар тирән.

Үз иткән дә кебек мине дөнья!
… Тик сиздерә кайчак ятлыгымны…
Җил җилгәрсен, әйдә, якын дуска
Сыялмаган тамчы шатлыгымны…

Тар кебек бу дөнья. Кайчакта
Бу дөнья киң кебек. Түгел дә.
… Ял итәм дөньядан бер көнгә —
Йомылам үземә… Бүгенгә!..

Эльмира Җәлилова.

Комментарии:

Добавить комментарий

Войти с помощью: 

Ваш e-mail не будет опубликован.

Имя *
E-mail *
Сайт